وأثناء ما انت بتقرأ السطور دي… وفي قلب شانغهاي، الصينيين شغالين في صمت على بناء شبكة مالية جديدة ونظام مالي موازي محدش يقدر يجمده أو يسيطر عليه، وهدفه إنه يخرج بالعالم من تحت مظلة الدولار والتحكم الأمريكي في اقتصادات الدول وثرواتها...
⚫️ بس المرة دي، النظام ده مش هيكون أساسه شوية ورق زي كل مرة... ولا حتى العملات الإلكترونية المشفرة... بل هو هيبقى معتمد على أقدم مصدر للثروة والفلوس في تاريخ الحضارة البشرية... الدهب...
🔸️ خليني أحكيلك الموضوع بالتفصيل، عشان تبقى فاهم القصة بدأت ازاي والعالم متوجه لأيه... وخلي بالك إن المقال ده يعتبر الجزء الثالث من سلسلة (كيف ستسرق أمريكا العالم)
🔴 بص يا سيدي...
القصة كلها بدأت في أواخر 2022، لما بدأ الغزو الروسي لأوكرانيا... الغزو ده برغم انه كان بداية وبال كبير على أوروبا واقتصادها، واتسبب في مشاكل كتير حصلت في الكوكب كله بعدها، إلا إنه في نفس الوقت كان بمثابة الباب اللي فتح الطريق بعدها أمام تغيير النظام المالي للعالم كله...
والسبب؟ غطرسة أمريكا!
🟢 أمريكا يا صديقي بعد ما الغزو الروسي بدأ، خدت خطوة شديدة وقوية جدًا، وهي إنهم جمدوا أصول روسيا الأجنبية المحفوظة كاحتياطي نقدي في البنوك الغربية والأمريكية، بإجمالي أكتر من 300 مليار دولار من الأصول والسيولة المُجمدة في خزائن الغرب!
واشنطن لما خدت الخطوة دي، كانت فاكراها هتكون ضربة قاصمة للروس، وإنها هتفرض بيها قوتها ونفوذها الاقتصادي على موسكو، وتجبرهم على إيقاف الحرب خوفًا من انهيار اقتصادهم... إلا إن الخطوة دي على العكس تمامًا، كان ليها مفعول مضاد ومعاكس مكانوش متوقعينه إطلاقًا...
🔹️ والمفعول ده أيه؟
إن العالم كله فقد القدر الباقي من الثقة اللي كان عنده في أمريكا والدولار!
🔵 أمريكا يا صديقي لما عملت عملتها دي، فالأمر كان كإنها بتبعت رسالة واضحة جدًا لكل دولة عندها احتياطي نقدي في البنوك الغربية... والرسالة دي هي ببساطة: "فلوسك دي مش بتاعتك، وممكن تتصادر منك بضغطة زرار لو قررت تختلف معانا في الرأي والسياسة في أي وقت وأي مكان ومهما كانت قوتك، حتى لو انت قوة نووية عظمى زي روسيا!"
وتأثير الرسالة دي كان عظيم ومخيف...
🟣 بمجرد ما المشهد ده حصل، الذعر العالمي وعدم الثقة في الحكومة الأمريكية والعملة الأمريكية وحتى الاستثمار في أمريكا نفسه؛ بدأ يكبر وتضخم زي كورة الثلج، لحد ما وصل لإنه يتحول لحركة عالمية غير مسبوقة في التاريخ الحديث، بتتسمى حاليًا ما بين الاقتصاديين بإسم "فك الارتباط بالدولار" أو الـ De-dollarization...
🔸️ طب يطلع أيه الـ De dollarization ده يا عم علام؟
🟡 المعنى باختصار يا صاحبي هو إن فجأة كده؛ البنوك المركزية حول العالم وخصوصًا في الدول النامية والأسواق الناشئة، بدأت دلوقتي تبيع الأصول الأمريكية اللي معاها زي سندات الخزانة U.S Treasuries، وتشتري مكانها دهب حقيقي بوتيرة سريعة جدًا...
والسبب في ده هو إنهم شافوا اللي حصل في روسيا عشان تجرأت على الوقوف ضد مصالح أمريكا والغرب، ودي قوة نووية كبرى.. ما بالك بقى بالدول اللي معندهاش نووي، أو عندها بس مش في نفس قوة روسيا ولا تأثيرها ونفوذها العالمي؟
🟠 الدول دي فجأة أدركت ان استثمارها في الأصول الأمريكية واعتمادها على الدولار ونظام الدفع والاقتصاد الأمريكي هو أشبه باحتلال اقتصادي مقنع بدون رصاص أو جيوش... وإنه عاجلًا أم آجلًا هييجي الدور عليهم ورقابهم هتقع تحت المقصلة، أول ما تيجي اللحظة اللي مصالحهم تتعارض فيها مع المصالح الأمريكية...
⚫️ وعشان كده دول كتير جدًا في العالم، منها اللي هما أصلًا حلفاء لأمريكا زي اليابان مثلًا، ومنها دول ضد السياسة الأمريكية زي البرازيل، ودول تانية كتير، بدأوا يتخلصوا من السندات الأمريكية ويشتروا بدالها دهب...
🔹️ وعلى رأس الدول دي كانت الصين...
🟢 في خلال الشهور الأخيرة، بنك الشعب الصيني أصبح رسميًا وبناءً على التقارير الاقتصادية، هو أكبر مشترٍ للدهب في العالم كله... وأثناء ما انت بتقرأ السطور دي هما دلوقتي عمالين يزودوا احتياطياتهم من المعدن الأصفر بشكل علني وظاهر للعالم كله، وهسيبلك مصادر وCharts بيانية في المصادر تحت عشان تشوف بنفسك حجم الشراء بتاعهم واصل لفين 👇
🔴 وكل ده عشان يبعتوا رسالة قوية لباقي العالم، مفادها إن الملاذ الآمن ليس الدولار، ومش المفروض أبدًا كان يكون الدولار... وإنما الملاذ الآمن هو الشيء الوحيد اللي كانت بتتقاس بيه ثروات الأمم على مر التاريخ... الدهب اللي مبيصديش ولا بيبوظ ولا بيتقطع ولا بيتهكر، ولا تقدر أمريكا تتحكم فيه مهما حاولت...
بس الصين بقى عشان تحقق سياستها في القضاء على الدولار، مش بس بتشتري دهب وخلاص... لأ... دول بدأوا يجهزوا حاجة مهمة أوي ممكن تكون مخدتش بالك منها، لكنها حاليًا أصبحت مفتاح التغيير في النظام العالمي الجديد...
🔵 الحاجة دي هي بورصة شنغهاي للدهب أو الـ (SGE)...
الصين يا صديقي في سنة 2002، أسست بورصة كبيرة للدهب في مدينة شانغهاي، وطول السنين اللي فاتت دي كانوا بيشتغلوا عليها وبيكبروها لحد ما وصلت لإنها تبقى حاليًا أكبر سوق للدهب في العالم... واللي أساس التعامل فيها هو الدهب الحقيقي المادي اللي مفيش فيه أي تلاعب من أي طرف...
🟡 وبما إن الصين عايزة تتخلص من الدولار وتخلي عملتها (اليوان) تبقى البديل الجديد للدولار اللي تقدر الدول تعتمد عليه في التجارة العالمية، فهي لازم تربط عملتها دي بالدهب عشان الناس تثق فيها... وعشان تعمل ده، فهي لازم تبقى تحت إيديها كميات كبيرة من الدهب عشان تقدر بيها تغطي الاقتصاد...
وطبعًا هما عارفين إن مستحيل حد تاني يثق في أي دولة أيًا كانت إنه يسيب عندها احتياطي الدهب بتاعه، بعد اللي أمريكا عملته في العالم بعد الحرب العالمية التانية لما خدت الدهب بتاعهم وقالتلهم انها هتربطه بالدولار، وبعدين جت في السبعينات قالتلهم والدتكم في العش ولا طارت، ومالكوش حاجة عندي...
⚫️ طب يعملوا أيه بقى عشان يخلوا العالم يرجع يثق تاني في الدهب، وإن مفيش قوة بعينها هتتحكم فيه وتسرق العالم زي ما عملت أمريكا في السبعينات؟!
🔸️ هنا بقى ظهرت الفكرة العبقرية... ممر الدهب أو الـ Gold Corridor...
🟢 الصين يا صديقي حطت خطة فريدة من نوعها وبرغم بساطتها إلا إنها ذكية جدًا... الخطة دي هي إنها باختصار هتشتغل مع كل أعضاء تحالف البريكس، (واللي منهم مصر والبرازيل وروسيا والهند وجنوب أفريقيا)، على بناء شبكة من الخزاين المؤمنة، ممتدة جغرافيًا داخل حدود الدول كلها، هيسموها "ممر الدهب"...
الشبكة دي هتسمح للدول اللي هتنضم للتحالف والنظام الاقتصادي الجديد القائم على الدهب ده، بإنها تخزن الدهب بتاعها في أماكن آمنة وموثوقة داخل حدودها وداخل حدود عدد كبير من الدول بأنظمة مختلفة وحكومات مختلفة مفيش شخص واحد بيتحكم فيها...
🟣 وبكده، فالدول مش هتضطر إنها تثق في الصين لوحدها عشان تحافظ على دهبها، لإن الدهب هيكون متوزع في خزاين تابعة لدول البريكس وكل جرام منه متوثق في بورصة شانغهاي بنظام مؤمن ومشفر مفيش مجال لاختراقه... وبالتالي لما الصين تربط اليوان بالدهب ده، فهي كده بتديله ميزة تجارية كبيرة جدًا الدولار حاليًا مبيوفرهاش...
الثقة في إن اليوان مش مجرد شوية ورق، بل هو مستند ومُغطى بأصل مادي محدود ونادر، لا يمكن تجميده أو استعماله كسلاح، ولا يمكن طباعته...
🟠 وبالشكل ده، فالدول النامية اللي زي دول إفريقيا مثلًا، واللي هي أصلًا غنية بالموارد الطبيعية ومناجم الدهب، هتقدر لأول مرة تعمل حاجة مكانتش بتحصل قبل كده...
هتقدر إنها تحط الدهب بتاعها اللي بتستخرجه من أرضها، في شبكة بورصة شانغهاي، وبعدين بنك البريكس اللي هو (بنك التنمية الجديد) هيقدم لها قروض باليوان الصيني مقابل الدهب ده، لتمويل مشاريعها التنموية الضخمة زي الطرق والموانئ والمطارات والمدن الجديدة...
🔹️ وبكده، تبقى الصين عملت أيه؟
تبقى بتدعم التنمية في دول العالم وبتزود نفوذها المالي والاقتصادي، وفي نفس الوقت بتساعد الدول دي إنها تتجنب إنها تطلب المساعدة من صندوق النقد الدولي (IMF) أو تضطر إنها تتعامل بـ الدولار الأمريكي... وبكده فهي -ببطء- بتفكك النظام العالمي الاقتصادي السائد دلوقتي، وبتسلب من أمريكا أعظم سلاح بتمتلكه... سلاح الدولار الأمريكي والعقوبات الاقتصادية!
🟡 الكلام ده يا صديقي مش مجرد كلام... دي خطوات حقيقة بتاخدها الصين دلوقتي، وبالفعل اشترت 44.2 طن من الدهب في سنة 2024، عشان توسع الاحتياطي الذهبي بتاعها وتشتغل على تنفيذ النظام ده بشكل سريع، قبل ما أمريكا تلحق تأسس النظام الموازي الجديد بتاعها المعتمد على العملات المشفرة، واللي كلمتك عنه في الجزء اللي فات من المقال ده!
🟢🟣 لأول مرة في التاريخ الحديث، إحنا داخلين قريب على منافسة حقيقية بين دولتين ونظامين وشكلين مختلفين من الفلوس، على الهيمنة الاقتصادية.. والله أعلم الصدام ده هينتج عنه أيه ومين الي هيكسب فيه... لكنه صراع شغال دلوقتي وبيدور أثناء ما انت بتقرأ السطور دي، وبالفعل كل دولة بتاخد صف عشان تحضر للي جاي...
⚫️🔘 وده سبب اللي انت شايفه بيحصل دلوقتي من شراء كبير جدًا من بعض الحكومات والبنوك المركزية للدهب، وبعض الحكومات والبنوك التانية اللي بتزيد من مخزونها من العملات الرقمية سواء البيتكوين أو العملات المستقرة Stable Coins... والصدام جاي بلا محالة...