اللعبة اللي بتحصل دلوقتي يا صديقي كبيرة أوي وخطيرة، ومش هتكون ما بين الدول وبعضها خلاص… اللعبة حاليًا بتتلعب على الكوكب كله، وفي خطط مرسومة من شهور، والهدف منها بسيط... إن العالم كله يشيل ديون أمريكا، اللي بتمر دلوقتي بواحدة من أخطر الأزمات المالية في تاريخهم الحديث!
⚫️ طب إزاي؟
من يومين كده، جريدة الـ Economic Times نشرت تقرير كان تأثيره على الرأي العام والأسواق في أمريكا أقرب للقنبلة... التقرير ده قالك إن الدين العام الأمريكي دلوقتي وصل لحوالي 37.9 تريليون دولار!
🟢 أنت ممكن تكون متخيل انك مستوعب الرقم، بس الحقيقة إن العقل البشري ميقدرش يستوعب رقم زي ده بسهولة خالص... عارف يعني أيه بلد تكون مديونة بحوالي (38 ألف مليار دولار) كاملين؟!
عشان أقرب الموضوع لذهنك، يكفي إني أقولك إنك لو كنت مواطن أمريكي عايش في نيويورك ولا واشنطن، فـ أنت بلدك دلوقتي أصبحت بتستلف حوالي 25 مليار دولار كل 24 ساعة!
🟡 وحاليًا حكومتك نفسها بتمر بحالة إغلاق عشان الكونغرس بتاعك مش قادرين يتفقوا على شكل الميزانية والإنفاق الحكومي لحد دلوقتي بقالهم داخل ف أسبوعين... ومع كل يوم بيمر في الأسبوعين دول، البلد بتخسر 15 مليار دولار كتأثير مباشر للإغلاق ووقف الحال ده!
الموضوع مش مجرد كلام ولا تهويل من الصحافة... دي أرقام رسمية منشورة من داخل الحكومة الأمريكية نفسها، وكلها بتأكد إن إن أكبر اقتصاد في العالم داخل دلوقتي على حيطه مالية مسدودة...
🔸️ طب هو ليه كل ده بيحصل وازاي الاقتصاد الأمريكي وصل للمرحلة الكارثية دي؟!
عشان تفهم كل حاجة، خلينا نمهد للموضوع ونفرشله كده، ونرجع بالزمن لورا كام شهر... 👇
🔴 شوف يا سيدي... الحكاية بدأت في شهر 7 اللي فات، لما الكونغرس الأمريكي قرر يرفع سقف الدين الفيدرالي، وزودوه بحوالي خمسة تريليون دولار ضمن تعديلات قانون ترامب الجديد، اللي كانوا مسميينه "القانون الجميل الكبير Big Beautiful Bill"...
طب يعني أيه يرفعوا سقف الدين؟
🟣 يعني باختصار وببساطة كده، أمريكا عندها في القانون بتاعها مادة بتحط للحكومة سقف في الاقتراض، أو حد أقصى مينفعش الدين العام اللي على البلد يزيد عنه... والسقف ده قبل ما القانون يتطبق، كان حده الأقصى واصل لحوالي 36.1 تريليون دولار!
بس المشكلة إن البلد كانت خلاص داخلة على مرحلة الشلل الكامل، لإن الحكومة عندهم مش معاها فلوس والدنيا بايظة معاهم ومصاريفهم أكتر من اللي بيدخلوه، فـ بالتالي لازم يستلفوا ويستدينوا مرة تانية عشان الدنيا تفضل مكملة والبلد متقفش... وكان في جدل كبير عندهم هناك على الموضوع ده، لحد ما ترامب مسك الرئاسة وقدر انه يمرر القانون بتاعه ده، واللي هيسمح بزيادة سقف الإستدانة لحد 41.1 تريليون دولار...
🔵 يعني هيديهم مساحة 5 تريليون دولار يلعبوا بيهم لحد ما يخلصوا، ويرجعوا يستلفوا تاني وهكذا... لحد ما يشوفوا حل للمشكلة العويصة اللي بتهدد اقتصاد أمريكا كله بالانهيار دي، ويعرفوا هيحلوها ازاي لإنها محتاجة وقت...
🔹️ طب بعد ما القانون اتطبق... أيه اللي حصل؟!
القرار ده يا صديقي بمجرد ما تم تطبيقه، فتح الباب لإن الحكومة ترجع تستلف تاني براحتها، ومن ساعتها ولحد اللحظة اللي انت بتقرأ فيها السطور دي، الدين العام زاد بمقدار 1.7 تريليون دولار، منهم 400 مليار في الشهر اللي فات لوحده بس!
🟠 عارف الرقم ده معناه أيه؟
معناه إن أمريكا دلوقتي أصبحت مديونة بأكتر من حجم اقتصادها بنسبة 124%... يعني نسبة الديون أكبر من نسبة الاقتصاد الأمريكي كله بحوالي 24% كاملين!
🔸️ بس المشكلة الحقيقية مش في مجرد الرقم ده بس...
🟡 المشكلة الحقيقية، واللي هي بالنسبالهم أقرب لمصيبة، هي إن الحكومة الأمريكية حاليًا أصبحت بتدفع أكتر من 1.2 تريليون دولار في السنة على الفوايد بس!
أيوه أنت قريت صح... فوايد بس بـ 1.2 تريليون دولار، ده غير أصل الدين نفسه... يعني بالشكل ده كده، فـ أمريكا أصبحت حاليًا بتدفع على أقساط خدمة فوايد الديون بس، أكتر من ما بتصرف على ميزانية الدفاع والجيش الأمريكي كله!
⚫️ ومع المبالغ الخزعبلية اللي بتتدفع دي، طبعًا الإنفاق على التعليم والصحة والبنية التحتية دلوقتي بدأ يتقلص واحدة واحدة، لدرجة ان في مدن كتير جدًا في أمريكا دلوقتي أصبح المواطن الأمريكي شايف الخدمات اللي هو كان بيحصل عليها زمان بتقل، والبنية التحتية عنده متدمرة ومحدش بيصرف عليها ولا بيعمل فيها حاجة، عشان الديون بتاكل الميزانية ومش سايبة حاجة تتصرف على الناس!
ده كان الوضع لفترة طويلة، وبقاله سنين مستمر على الحال ده، لحد ما جه ترامب، وقرر إنه يحاول يصلح المشكلة من خلال إنه يعتمد على سلاح الرسوم الجمركية... وبالفعل بدأ حرب تجارية كبيرة مع العالم كله، وفرض جمارك على معظم دول الكوكب بما فيهم الصين اللي فرض على منتجاتها جمارك وصلت 245%...
🟢 وبسبب ده، وبناءً على الأرقام الرسمية، فـ إجمالي الرسوم الجمركية زادت بنسبة 273% السنة دي، ونجح بالفعل في إنه يجمع 21 مليار دولار في شهر واحد بس... وده رقم قياسي محصلش قبل كده تقريبًا... بس المشكلة انه ما زال ولا حاجة، قدام الـ 1200 مليار اللي محتاج يجيبهم عشان بس يغطي فوايد الديون... والفايدة مع كل يوم بيعدي بتزيد، وبتزود الأزمة أكتر...
طيب ده معناه أيه؟!
🟣 معناه يا صديقي إن أمريكا لو فضلت ماشية بالشكل ده كده، فـ هي طبعًا مش هتنهار في يوم وليلة... لكنها بحسب آراء الإقتصاديين "هتفلس ببطء"، زيها زي الإمبراطوريات الكبيرة اللي جت قبل كده على مرة التاريخ، وبدأت تنهار تدريجيًا بسبب الديون والأزمات المالية، لحد ما انتهت تمامًا...
🟢🟡 لكن طبعًا زي ما انت عارف، هما مش هيسكتوا، ومش هيسيبوا نفسهم ينهاروا أكيد... وبسبب قدر الديون اللي عليهم ده، فهو دلوقتي مبقاش في حل واقعي يخليهم يقدروا يسدوها بطريقة طبيعية، ومعظم الخبراء الاقتصاديين بيقولوا ان الديون الأمريكية وصلت لمرحلة انها "لا يمكن سدادها" خلاص...
🔵🔹️ وعشان كده، وبناءً على أبحاث مسحول فيها بقالي أسبوعين تقريبًا، بقولك ان أمريكا دلوقتي بتخطط لأكبر عملية نصب وسرقة مالية هتنفذها على العالم كله في التاريخ تقريبًا... وناويين انهم قريب أوي يلبسوا العالم في ديونهم ويخرجوا هما منها زي الشعرة من العجين، ويصفروها كلها بدون ما يتحملوا منها إلا أقل القليل...
🔸️🟢 وسلاح عملية النصب الكبرى دي هيكون حاجتين... الدهب والبيتكوين!
واللي هيشيل الديون دي كلها هو أنا وانت وكل شخص عايش في العالم ده، ما زال لسه بيتعامل تحت أسس النظام العالمي اللي بتديره أمريكا!
🟠 طب إزاي ده هيحصل وبيحصل أصلًا دلوقتي؟
القصة دي بقى طويلة جدًا ومذهلة، هتكشفلك مصايب أنت بنسبة 90% مش عارف عنها حاجة لإن الإعلام مبيتكلمش عنها خالص، ومحدش أصلًا متابعها غير المؤسسات الاقتصادية الكبيرة، وعشان كده دلوقتي بيتجهوا لشراء الدهب بكميات ضخمة جدًا، عشان يحضروا للحرب الاقتصادية الكبرى اللي جاية...
🔴 هحكيلك التفاصيل دي بقى في الجزء التاني من المقال ده بكره بإذن الله، عشان ناخدها مع بعض واحدة واحدة لحد ما يوصلك اللي بيدور في الكواليس كله... ف خليك مستني لإن القصة طويلة لسه..
⚫️ وفي النهاية كالعادة هسيبلك المصادر لكل المعلومات والأرقام دي في أول كومنت تحت 👇 ومتنساش تعمل شير عشان الموضوع يوصل لغيرك ويستفيد منه ويفهم اللي بيدور في العالم دلوقتي...
