أثناء ما انت بتقرأ السطور دي وفي قلب مكاتب وأروقة واشنطن، الإدارة الأمريكية بتخطط في صمت للعبة كبيرة هدفها ثروتك... والغاية النهائية منها هي تصفير الديون الأمريكية اللي وصلت لمرحلة غير مسبوقة تاريخيًا، وإلقاءها على أكتاف شعوب العالم كله، كمحاولة أخيرة من أمريكا انها تتجنب مصير الإمبراطوريات اللي انهارت قبل كده بسبب ديونها...
⚫️ طب إزاي بقى هيعملوا ده، وأيه علاقة العملات الإلكترونية بالموضوع؟ وإزاي هيستخدموا العملات دي عشان يخلوا العالم كله يحاسب على فاتورتهم؟
🔸️ خليني أحكيلك القصة من البداية بالترتيب عشان تبقى فاهم التفاصيل كلها... وخلي بالك إن المقال ده يعتبر جزء ثاني من سلسلة (كيف ستسرق أمريكا العالم)
🔴 شوف يا سيدي...
الحكاية بدأت في بداية شهر سبتمبر اللي فات ده، في قلب مؤتمر الشرق الاقتصادي اللي تمت إقامته في مدينة فلاديفوستوك في شرق روسيا...
في واحدة من جلسات المؤتمر ده، واحد من أقرب مستشاري بوتين الإقتصاديين، اسمه "أنتون كوبيـاكوف"؛ قال تصريح غريب وغير مفهوم، أثار فضول وقلق الاقتصاديين والمؤسسات المالية والسياسية في كل حتة في الكوكب...
🟢 قالك ببساطة إن الولايات المتحدة الأمريكية بتجهز حاليًا خطة لتحويل ديونها الضخمة لسحابة من العملات الرقمية، تمهيدًا لخفض قيمتها أو تصفيرها سرًا وعمل "إعادة ضبط أو Reset" للنظام المالي العالمي كله، عشان تشيل باقي العالم شيلتها، وتخرج هي من الأزمة بتاعتها من غير ما تدفع ولا مليم!
التصريح ده للوهلة الأولى وانت بتقراه دلوقتي ممكن يبانلك كإنه نظرية مؤامرة مثيرة مش أكتر ومفيش عليها أي دليل... بس المذهل بقى هو إنك لو رجعت بالزمن كام سنة لورا، هتلاقي إن الموضوع مش خيال ولا نظرية مؤامرة ولا حاجة... بل على العكس تمامًا... الخطة دي سبق وطرحها شخص مش عادي إطلاقًا في أوساط مجتمع الاقتصاديين ومؤسسات المال الأمريكية...
🔵 والشخص ده مين؟
"مايكل سايلور"... الملياردير الأمريكي المعروف ومؤسس شركة "مايكروستراتيجي MicroStrategy" المتخصصة في تطوير برمجيات الأعمال والسوفت وير وخدمات الحوسبة السحابية Cloud Computing...
🟡 الراجل ده يا صديقي يعتبر واحد من أكبر المليارديرات الأمريكيين، وأكبرهم على الإطلاق استثمارًا في شراء عملات البيتكوين، وشركته لوحدها بتمتلك حاليًا حسب التقارير الإقتصادية حوالي 628,791 بيتكوين، بقيمة إجمالية تساوي أكثر من 71 مليار دولار!
🔸️ طيب... عمل أيه بقى الراجل ده وأيه علاقته بالموضوع؟
"سايلور" يا صديقي في نهاية سنة 2024، وتحديدًا أثناء تسجيل صحفي عمله في شهر ديسمبر اللي فات، نصح الرئيس ترامب والولايات المتحدة الأمريكية كلها عمومًا، بإنهم يبيعوا كل الدهب الأمريكي ويشتروا بيه عملات البيتكوين Bitcoin المشفرة!
🟣 ومش بس كده... ده نصح بعدها "إيريك ترامب" إبن الرئيس دونالد ترامب في لقاء تاني في يناير من 2025، إنهم يبيعوا أو يرهنوا المنتجع المشهور بتاعهم Mar-a-Lago، ويشتروا بثمنه بيتكوين..
طب هي أيه النصيحة الغريبة دي؟ وليه أمريكا تعمل كده أصلًا؟!
🟢 عشان بحسب "سايلور"، فأمريكا لما تبيع الدهب بتاعها كله، اللي هو حاليًا يقدر بحوالي 8,133.5 طن تقريبًا، فهما هيقدروا يشتروا بقيمته حوالي 5 مليون عملة بيتكوين... وبكده هيضمنوا سيطرة مباشرة على معظم الشبكة العالمية للعملات الرقمية المشفرة، وهيحولوا البيتكوين إلى أحد الأصول الاستراتيجية الرئيسية للولايات المتحدة...
🔘 طب بردو مفهمناش... ليه أمريكا تعمل كده أصلًا، وتتخلى عن حاجة مضمونة زي الدهب، عشان تشتري بيها بيتكوين؟
🔹️ السبب يا صديقي لما تبدأ تستوعبه، هتلاقي قلبك اتقبض...
"سايلور" بيقولك إن تنفيذ التوجه ده، هيخلي قيمة الدهب التاريخية يتخسف بيها الأرض وتبقى مستسواش حاجة غير بضع دولارات... بينما البيتكوين لما يزيد استثمار واعتماد أمريكا عليه، هتزيد قيمته بشكل رهيب جدًا، لدرجة إنه إجمالي قيمة العملات اللي هتمتلكها أمريكا منه هتوصل (حسب تقديراته) لحوالي 100 تريليون دولار!
🔴 وبكده هتبقى أمريكا عملت حاجة بسيطة لكنها كارثية...
هتبقى ضمنت إنها دمرت قيمة الدهب اللي بتمتلكه الدول المعادية ليها (اللي هما الصين وروسيا)، وبكده هتدمر اقتصادهم كله وتخليهم يواجهوا انهيار مالي غير مسبوق... وفي المقابل أمريكا هتبقى اتحكمت خلاص في احتياطي العالم المستقبلي من رأس المال والثروة، اللي هي هتبقى كلها معتمدة على العملات الإلكترونية المشفرة!
وبكده تقدر أمريكا تتحكم في قيمة الديون بتاعتها بسبب تحكمها في قيمة البيتكوين، وتقدر تخفض قيمة الديون اللي عليها وتسددها كلها، وتخلي العالم كله يتدبس في ديونها بدل ما هي اللي تنهار...
🟡 طب معلش ثانية... هل الكلام ده منطقي أصلًا؟ وهل ممكن يحصل فعلاً؟
الجواب المذهل بقى هو أيوه ممكن يحصل، وأصلًا بيحصل دلوقتي خلاص، وأمريكا بالفعل واخدة اتجاه لتخفيض قيمة ديونها بشكل وهمي وسري محدش واخد باله منه غير المؤسسات الاقتصادية الكبيرة...
🟣 بس استنى خد بالك... الطريقة اللي بتستعملها أمريكا فعليًا مش هي نفس الطريقة اللي قال عليها "سايلور"... يعني امريكا مش هتبيع الدهب والكلام ده...
طب أومال الموضوع هيحصل ازاي؟
⚫️ الإجابة البسيطة هي إنه هيحصل عن طريق العملات الإلكترونية المستقرة أو الـ Stablecoins...
🟠🟡 بس الأول عشان تفهم القصة بشكل صحيح وببساطة شديدة، لازم الأول أحكيلك يعني أيه "تخفيض قيمة الديون" أو الـ Devaluation...
تخفيض الديون ده يا صديقي مش معناه إن أمريكا هتلغي جزء من ديونها ومش هتدفع اللي عليها... لأ خالص... المعنى الحقيقي للكلمة دي، هي إن أمريكا هتخفض "القيمة الحقيقية للفلوس اللي هتدفعها" عن طريق حاجة اسمها "التضخم أو الـ Inflation"...
🔹️ طب يعني أيه التضخم ده؟!
🔴🔴 بص يا سيدي، تخيل إن كل ثروة العالم اللي موجودة حاليًا لكل الدول، هي عبارة عن ورقة بـ 100 دولار...
أنا بقى كأمريكا، جيت واستلفت الـ 100 دولار دي كلها من الدول التانية بحجة إني "بحميهم"، وشغلتها عندي وربطتها باقتصادي عشان أدور عجلة التنمية عندي وأتحكم في اقتصاد الدول التانية، وأصرف على جيوشي والمصانع بتاعتي ومراكز الأبحاث، وأبقى الدولة الأكبر في العالم...
وفي يوم من الأيام بقى لما انت تيجي تطلب مني إني أرجعلك الـ 100 دولار دي، بدل ما أرجعلك نفس الـ 100 اللي انا خدتها منك وأفلس انا، لأ أنا عندي قوة خارقة... القوة دي هي إني بتحكم في العملة الاحتياطية للعالم، بحجة إن ثروة العالم كله مربوطة بعملتي وبالاقتصاد بتاعي أنا...
🟡 فـ بدل ما أرجعلك الـ 100 دولار، هعمل حاجة تانية... هقوم طابع ورقة جديدة بـ 100 دولار بردو من الهوا كده، وهديلك الـ 100 دولار الجديدة دي، وأخلى معايا الـ 100 دولار الأولانية...
🔹️ كده بقى تفتكر انت أيه اللي حصل في اقتصاد العالم؟
اللي حصل هو إن بقى في 200 دولار بيطاردوا نفس كمية السلع والمنتجات اللي موجودة في العالم، اللي هي لسه زي ما هي ثابتة ومزادتش... اللي زاد بس هو عدد الدولارات نفسه... فبالتالي سعر كل حاجة هيغلى... وده مش عشان الحاجة نفسها قيمتها زادت... لأ... ده عشان عدد الدولارات اللي مع الناس هو اللي زاد، وبالتالي قيمتها الفعلية قلت...
🟢🔘 هو ده بقى التضخم...
أنا لما رجعتلك 100 دولار تانية غير الأولانية، طبعتها من الهوا حرفيًا، ف أنا كده يعتبر زودت كمية الفلوس وقللت قيمتها... وبالتالي الـ 100 دولار دي مبقتش تشتري نفس كمية الحاجات اللي كانت بتشتريها في الأول... بل أصبحت بتشتري 50% فقط من اللي كانت بتشتريه قبل كده...
وبكده؛ أبقى أنا خفضت قيمة الدين اللي عليا، وسددت ما يعادل نص الدين بس، وصفرت النص الباقي!
🔸️فهمت اللعبة جاية منين؟
🔵 طب ماشي خلاص فهمنا ازاي أمريكا ممكن تخفض قيمة ديونها عن طريق التضخم... إيه بقى دور العملات الرقمية المستقرة (Stablecoins) في اللعبة اللي بيخططولها دي؟
شوف يا صديقي... العملات الرقمية المستقرة دي، اللي هي زي الدولار الأمريكي الرقمي (USDT أو USDC)، هتسمح لأمريكا إنها توسّع اللعبة دي بره حدودها...
طب ازاي وأيه السبب؟
🟠 عشان العملات دي برغم إنها عملات رقمية وهمية، إلا إنها مربوطة بشكل حقيقي بسندات الخزانة الأمريكية أو الـ U.S. Treasuries...
يعني بمعنى أكثر بساطة: قصاد كل دولار رقمي (USDT أو USDC) موجود، أمريكا محتفظة بسندات خزانة ليها تكافيء قيمته أو سعره... وبالشكل ده، فأي دولار رقمي انت بتمتلكه أو بتشتريه، فأنت بالشكل ده هتبقى حامل لسندات "دين" أمريكية... حتى لو بشكل غير مباشر...
🟣 والكلام ده معناه أيه؟
معناه إن كل ما شخص في أي حتة في العالم بيستخدم عملة زي USDT أو USDC، فهو بيساعد بشكل غير مباشر في "تمويل ديون أمريكا"!
🔴 فـ لو انا بقى كإدارة أمريكية، جيت في أي وقت وزودت التضخم من خلال إني طبعت دولارات زيادة أو بأي وسيلة تانية، فالخسارة في قيمة الفلوس المرة دي مش هتعود بس على المواطن الأمريكي اللي بيستعمل العملة المطبوعة اللي جوه البلد...
لأ... الخسارة المرة دي هيتم (تصديرها للعالم كله) عن طريق العملات المستقرة دي... وده لإن قوتها الشرائية هتقل هي كمان لإنها مربوطة بالدولار بردو!
🔸️ يعني من الآخر كده، التضخم هيبقى زي "ضريبة مشتركة" بيدفعها كل اللي معاهم العملات دي من ثروتهم!
⚫️ طب ليه العالم كله خايف من الموضوع ده؟
🔴 لإن الدول الكبيرة فاكرة اللي حصل في 1971، لما الرئيس نيكسون فك ارتباط الدولار بالدهب فجأة ونصب على العالم كله في ثروتهم من الذهب اللي كانت مخزناه أمريكا عندها وقالهم مالكوش عندي حاجة... والحدث ده معروف تاريخيًا بإسم "صدمة نيكسون"...
النهاردة، مفيش أي ضمانة تمنع أمريكا إنها تعمل نفس الحركة دي تاني، بس المرة دي مع العملات المستقرة... عشان أمريكا كده كده من عادتها إنها بتغير قواعد اللعبة وقت ما تحب، ومبيفرقش معاهم حد!
🟢 وعشان كده، فالدول الكبرى دلوقتي كلها متجهة لشراء الدهب بكميات ضخمة جدًا، عشان عايزين ينفدوا بجلدهم من المصيدة اللي بتخططلها أمريكا دلوقتي دي...
🔘🟡 ومن ضمنهم بالمناسبة مصر اللي حاليًا بتشتري دهب بكميات رهيبة... وحسب آخر إحصائية، فالبنك المركزي المصري اشترى 18.1 ألف أونصة ذهب في شهر فبراير اللي فات، وقبلها اشترى 16.4 ألف أونصة دهب تانيين في شهر يناير 2025... وبكده أصبح رصيد الذهب لدى البنك المركزي المصري هو حوالي 4.11 مليون أونصة بنهاية شهر فبراير 2025...
وكل شهر تقريبًا البلد بتشتري دهب وتخزنه، بس الموضوع مش بيتم الإعلان عنه في الإعلام...
🔸️🟣 المهم بقى إن الهدف اللي بتسعى له الدول اللي بتشتري الدهب دلوقتي، واللي هما كلهم غالبًا من ضمن تحالف "البريكس BRICS"، هو إنهم يأسسوا لنظام مالي موازي، يكون معتمد على الدهب بدل العملات الرقمية المشفرة... وهو ده بالضبط اللي بتشتغل عليه الصين دلوقتي، بطريقة مذهلة وهتبهرك بمعنى الكلمة لما تفهمها وتستوعب هي بتعمل أيه في العالم وانت مش واخد بالك!
هحكيلك بقى الموضوع ده كله في الجزء الثالث من المقال ده، واللي بإذن الله هيصدر بكره في نفس المعاد، وهيفهمك كل حاجة... وهيخلي اللمبة اللي في دماغك تنور، لما فجأة تستوعب أيه اللي بيدور في الكوكب، وليه كل الأحداث المتفرقة غير المفهومة دي بتحصل..
