الدنيا مقلوبة في أمريكا حرفيًا… عارف ليه؟ لأن رئيس أمريكا الحالي ترامب داخل الشرق الأوسط ومعاه عملة رقمية هو وعيلته عاملينها، وبيحاول يخلص بيها صفقة بـ 2 مليار دولار مع صندوق استثمار إماراتي، والصندوق ده ناوي يستخدم العملة دي عشان يستثمر في منصة العملات الرقمية "بينانس"… يعني ترامب في وضع إنه بياخد قرارات سيادية كرئيس، وفي نفس الوقت بيكسب من وراها كمستثمر!

العملة اسمها USD1، وعيلته – من أول إريك ترامب، لدونالد جونيور، لحد بارون ترامب – كلهم واخدين مناصب في المشروع، ومكلفين نفسهم ألقاب زي "رائد التمويل اللامركزي" و"سفير Web3" وكأننا في لعبة مش في دولة. العيلة كلها ماسكة 60% من الشركة وبتاخد 75% من مبيعات العملة. يعني لو الصفقة دي تمت، الفلوس هتدخل جيبهم وهم لسه في الحكم.

الأظرف؟ الموقع الرسمي للعملة عمل دعوة لـ 220 مستثمر من كبار اللي شارين العملة، وقالهم تعالوا على عشاء خاص مع الرئيس ترامب! وكان كاتب إن العشاء فيه ارتباط بالرئاسة والبيت الأبيض، بس لما الناس شافت إن كده فيه تضارب مصالح صريح، الموقع شال الكلام ده بسرعة.